Umkhankaso kaZwelonke wezinsuku ezingu-16 zokulwisana nodlame olubhekiswe kwabesifazane nezingane uqale ngmhlaka-25 Novemba 2003, kanti njengoNgqongqoshe wezokuThutha KwaZulu-Natali ngiyaphinda nginxusa wonke umphakathi ukuthi ulwisane nodlame olubhekiswe kwabesifazane nezingane.

Angiqali ukunxusa umphakathi ngaloludaba. Ngiyaphinda ngiyalugxeka njengobulwane udlame olubhekiswe kwabesifazane nezingane futhi yinto esingasoze sayibekezelela. Izigilamkhuba ezenza lesisenzo esinyantisayo ziyojeziswa ngaphandle kozwelo.

Nginxusa zonke izakhamuzi zaseNingizumu Africa ukuthi zibambe iqhaza ekulweni nalomkhuba omubi kangaka. Yonke inhlobo yodlame oluqondiswe kwabesimame, ngabe yizitikha ezibabhuqayo zibehlise nesithunzi kumbe ukushayela okubeka izimpilo zabantu ebucayini, konke lokho kungukuhlukumeza amalungelo oluntu.

Ukushayela budlabha, ukushayela uphuze utshwala, ukuvuka umbhejazane emgwaqeni kuholela ekulimaleni ngisho nasekufeni kwabantu. Loludlame luvamise kakhulu ukuqondiswa kwabesifazane nezingane. Maluphele nya loludlame emigwaqeni yethu.

Nonyaka loludlame luzodingidwa kabanzi futhi kuboniswane nentsha yabafana namantombazane mayelana nezindlela zokuqeda lomkhuba omubi kangaka.

Masihlangane sonke ekulweni nokudlwengulwa, ukuhlukunyezwa nokubulawa kwabantu besifazane nezingane. Masingagcini lapho kuphela kepha masibuyisele isiko loBuntu nokuyilona eliqhakambisa ukuphathwa kahle kwezingane nabantu besifazane.

Udlame olubhekiswe kwabesifazane luvamisile kwabasebenzisa umgwaqo lapho uthola khona kuhlukunyezwa abantu besifazane baze bahlaselwe nokuhlaselwa imbala. Loludlame aludalwa wukulakanyana kwezimoto emgwaqeni kepha isisusa salo ngumuntu ohlala ehluthukile ongenasineke. Kuvamisile ukuthi ukuhluthuka lokhu kuphethe ngokushaywa kwabantu besifazane kwesinye isikhathi beshaywa phambi kwezingane zabo. Ubuqaba obunjena asihambisani nabo.

Ngeke lobubulwane buphele uma amadoda engaguquli imiqondo nezinhliziyo zawo ahambisane nesiko lamalungelo esintu. Masiziqhelanise nabo bonke labo abanodlame kubantu besifazane kingaba ngabashayeli, abagibeli kumbe abahamba ngezinyawo. Izzitikha ezinamazwi aziswana aqondiswe kwabesimame zibacokofula ngokuma kwemizimba yabo azinandawo kwiNingizimu Africa Entsha. Labo abasafaka lezizitikha ezimotini zabo kumbe ematekisini kumele bazi ukuthi lamahlaya abo awagcini nje ngokuthunaza abantu besifazane kepha abhebhezele umoya wokungabahloniphi oholela ekuhlukunyezweni kwabo.

Lomdlalo obulalayo wokugeyima ovamise kubashayeli bamadoda olunye uhlobo lodlame olunemiphumela enyantisa igazi. Yize lomdlalo ungaqondene ngqo nodlame olubhekiswe kwabesifazane nezingane kepha ugqugquzela ukushayela budlabha okuholela ekulimaleni nasekufeni kwezingane nabesifazane.

Sifuna ukuthula emigwaqeni yethu. Nginxusa bonke abasebenzisa imigwaqo lapha eNingizimu Africa ukuthi sihlangane sibe munye ekuqedeni lendlakadla. Wumsebenzi wethu sonke ukuthi sibike zonke izigameko zodlame emgwaqeni. Yiba yisakhamuzi esiqotho, bika izigameko zokwephulwa kwemithetho yomgwaqo kuMpimpa Hotline kulenombolo (086 221 1010). Ngokwenze njalo uyobe wenze omkhulu umsebenzi wokuvimbela udlame olubhekiswe kubantu besifazane nezingane.

back