INKULUMO KANGQONGQOSHE WEZOKUTHUTHA KWAZULU-NATALI UMNUMZANE S’BU NDEBELE ETHULA UHLELO LOKUQEQESHWA KO-ZIBAMBELE EKUBEKWENI KWEZIMALI (ZIBAMBELE SAVINGS CLUBS)

25 August 2003

 

Kwaba yintokozo kimi ukwethula uhlelo lokulungiswa kwemigwaqo KwaZulu-Natali uZibambele mhlaka-27 January 2001. Njengoba ngizovula uhlelo lwezoqeqesholuka-Zibambele noluzokwenganyelwa zikhwama zokonga imali (Zibambele Savings Clubs) ngizophinda engakusho ekuqaleni mhlazane kusungulwa uZibambele. Isizathu sokwenza lokhu ngukubheka ukuthi sesihambe kanjani njengoMnyango ekuthuthukiseni omama basemakhaya. Ukuthuthukiswa komama basemakhaya kumele singakubukeli phansi.

Amalungelo abantu besifazane ashicilelwe ngaphansi komthetho-sisekelo waseNingizimu Africa. Uhlaka lwemithetho yezwe lethu lusijuba ukuthi sisebenze ngenkuthalo ekuthuthukiseni abesifazane ngakwezomnotho nakweminye imikhakha. Kunezizathu ezibalulekile zalokhu.

Iminyaka ngeminyaka abantu besifazane ikakhulukazi aboMdabu bebecindezelwe ngezindlela eziningi icala labo kungukuthi bangabesifazane. Abesemakhaya bona bekukubi kakhulu.

Yingakho nje kwathi uma siqalisa loluhlelo lukaZibambele sacabangela lawomakhaya aphethwe ngabesimame. Kuyangikhathaza ukwazi ukuthi izingane ezingamaphesenti angu-46 zihlala nomama bazo. KwaZulu-Natali kubi kakhulu khona ngoba siphuma odlameni olwesabekayo olushiye izintandane nabafelokazi.

Mina ngikhulele emakhaya khona lapha KwaZulu-Natali. kanti ngikwazi kahle ukuhlupheka. Ngizibonele ngawami amehlo omame bezondlela bona imindeni yabo ngoba obaba bengasekho. Ngilubonile usizi komame abangakwazi nokugqokisa izingane zabo bengenakuziyisa nasesikoleni.

Kubuhlungu ukwazi ukuthi lolusizi lukhungethe iningi labesifazane basezindaweni zasemakhaya kulesisifundazwe sakithi. Siyakwazi lokhu ngoba ingane eyodwa kwezintathu ezingafundi kwezineminyaka esukela ku-6 kufike ku-14, iqhamuka kulesisifundazwe saKwaZulu-Natali. Siyazi nokuthi abantu abayizigidi ezingu-2.5 KwaZulu-Natali bahlwempu. Sikwazi lokhu ngoba imininingwane yezempilo ikhomba ukuthi amaphesenti angaphezu kuka-40 ezingane zalesisifundazwe azikutholi ukiudla okunomsoco. Siyazi ngoba iningi labesifazane lisengozini yesifo sikamashayabhuqe ngenxa yokucwaswa nawukuhlukiunyezwa okusukela eminyakeni yobandlululo.

Njengomholi wezombusazwe nanjengoNgqongqoshwe wezokuThutha KwaZulu-Natali angeke ngiluzibe usizi lomame abazibambe ngamazinyo kulesisifundazwe. Ukwehlisa izinga lobuphofu nokudala impilo engcono kuyophumelela uma sakha amathuba emisebenzi kwabampofu. ENingizimu Africa abampofu sibathola kuleyomindeni ephethwe ngabesifazane.

Umbuzo okhona uthi sesiqhubeke kanjani nokulwisana nobuphofu na? Imibiko engiyitholayo ithi kulonyaka sizokwakha amathuba angaphezu kuka-17 000 kaZibambele nokuzosetshezwa imigwaqo yamakhilimitha angu-11 0 50. Ngihlanganile nomame bakaZibambele bangichazela ukuthi selubasize kanjani loluhlelo. Iningi lingitshela ukuthi izimpilo zabo seziguquke kakhulu ngenxa yaloluhlelo. Bangitshela nokuthi sebezizwa behloniphekile, sebekwazi nokuthenga okuya ngasethunjini bathumele nezingane esikoleni. Bonke engikhulume nabo banethemba elikhulu ngekusasa labo kanti abawuvali umlomo bebabaza imisebenzi ebonakalayo eseyenziwe yiloHulumeni wentando yeningi.

Kumele siziqhenye ngalokhu.

Ngiyezwa njalo nokuthi kunezigilamkhuba ezithola ithuba lokusebenzisa kabi loluhlelo lukaZibambele. Ngizwa nanokuthi abanye omama kuyenzeka bangakhokhelwa kwesinye isikhathi kudliwe nemiholo yabo. Ngithola nanokuthi sekunezipoki zikaZibambele. Yihlazo leli.

Kulezizigilamkhuba ngithi " Sizonithola nijeziswe ngendlela eyohlala iyisibonelo esethusa noma ngubani ocabanga lenkohlakalo.

Yize kukhona lawomazambane abolile nginesiqiniseko sokuthi ikhona inqubekela-phambili nokuthi sebekhona omame izimpilo zabo esezingcono ngenxa kaZibambele. Uma ngihamba emigwaqeni elungiswe ngoZibambele ngiba nokuziqhenya ngoba ngaphambilini imisebenzi enjena bekwaziwa ukuthi ngeyamadoda kuphela

Ukunciphisa izinga lobuphofu eNingizimu Africa akukhona kuphela nje ukuvela nemisebenzi kepha kusho nokulwisana nemikhutshana yengcindezezo evela emlandweni woBandlululo. UhlelolukaZibambele luvale imilomo abaningi abebecabanga ukuthi ayikho into esile engavela nomuntu wesifazane, angiphathi-ke njengoba sesiqalisa namhlanje loluhlelolwezikhwama zokonga imali (Zibambele Savings Clubs)

Ngenkathi ngethula loluhlelo mhlaka-27 January 2001 ngabeka umgomo wezinkontileka ezingu-40 000. Kwavela imibuzo ezikhulwini zoMnyango zithi kungenzeka kanjani lokho ngabatshela ukuthi kudinga ukusebenza ngokubambisana sisungule izikhungo zokubeka imali futhi kube noqeqesho. Yinhloso yethu ukuthi bonke oZibambele basebenze ngamaqembu abeka imali. Lamaqembu azosisiza kakhulu ekubhekeleni ukusebenza kangcono kwaloluhlelo lukaZibambele.

Zizosiza ngani izikhungo zokonga mali na? Umlando wethu usukhombisile ukuthi abantu bakithi bayakwazi ukusimama uma besebenza ngokubambisana njengasekwakheni izitokofela ngoba kongiwa imali. Ukuzimbandakanya nalomkhankaso kucishe kufane nokusebenza kwabazalwane abalekelelana kuzo zonke izinselelo ababhekene nazo, abethembanayo nababambene ngezandla. Yizo-ke lezizizathu zokuthi sisungule lamaqembu oZibambele Savings Clubs ukuze kusebenzeke kahle futhi kutholakale noqeqesho olusebenza kahle.

Thina njengoMnyango wezokuThutha KwaZulu-Natali sibekelwe ukwakha imigwaqo kanti njengoHulumeni kumele sihambisane noMthetho-sisekelo ngokuthi siqede izinsalela zokungalingani okwavela ngesikhathi soBandlululo.. Lokhu kumele sikwenze ngokuthi ekuvuleni amathuba emisebenzi sicabangele kuqala labo abebencishiwe amathuba.

Ngakho-ke kuyinhloso yami ukuthi ngizeseke izikhungo ezifuze lezi zamaSavings Clubs kaZibambele ukuze bunciphe ubuphofu.

SinguMnyango wezokuThutha KwaZulu-Natali nazi izinhloso zethu ngokuhlanganisa osonkontileka bakaZibambele ukuthi basungule lamaSavings Clubs:

  • Ukwelekelela ekuqeqesheni nasekuthuthukiseni osonkontileka bakaZibambele ekutholeni izindlela okuyizona zona zokulungisa imigwaqo.

  • Ukwelelelela amalunga kaZibambele Savings Clubs ukuqinisekisa:

  • ukuthi bazi kabanzi ngamalungelo abo nezinye izinhlelo zokusiza abantu abampofu

  • ukuthi bakwazi ukubeka imali emabhange angaduli ngemisebenzi yawo

  • ukuthi bakwazi ukweboleka imali

  • ukuthi babe nemishwalelnse yokungcwaba

  • ukuthi bakwazi ukuzisungulela amabhizinisi abo

  • ukuthi bathole imifundaze

  • ukuthi bagcine bebhalise ku-Johannesburg Stock Exchange

Ukuze kufezeke leliphupho lethu sizoxhumanisa lezizikhungo zokubeka imali esizibiza ngoZibambele Savings Clubs neminye imiNyango kaHulumeni, izinhlangano zemiphakathi kanye nezizimele ukuze uZibambele athole ukwesekwa noxhaso olufanele emphakathini wonkana. Asilindele ukuthi lemizamo iphumelele ngosuku olulodwa kepha siyazi ukuthi lapha sizama ukuguqula ububha obuvela emakhulwini ngamakhulu eminyaka yangcindezelo. Ngakho-ke kuzodinga sibekezele ekwenzeni lomsebenzi ongaka ngoba akuwona umdlalo. Nokho siyazi ukuthi sithathe izinyathelo okuyizona zona ukuze sithole esizobambisana nabo kulomsebenzi ongaka. Siqalisa lamaSavings Clubs ngoba sifuna ukuthi izwe lonke likwazi esikwenzayo.

Kungalesisizathu-ke namhlanje sibikela izwe lonke nge-CD yomculo kaMakitaza no-Vusi Ximba ethi "Ezemigwaqo Namathuba Emisebenzi". Le-CD ibabaza igalelo lomame kwezemigwaqo. Igxile kakhulu eqhazeni abalibambile ekunciphiseni ubuphofu kulesisifundazwe. Le-CD iphathelene nezinye izinhlelo zoMnyango wezokuThutha KwaZulu-Natali esingabala nezokuphepha emgwaqeni. UMnyango wezokuThutha KwaZulu-Natali ubethulela isigqoko oMnumzane Makitaza beno-Vusi Ximba ngomcula wabo onamancoko kepha nosuhlanganise isifundazwe sonke yize kunokuphambana kwemibono emikhakheni yeahlukene kubala nowezepolitiki. Njengoba sigubha isonto lomculo waseNingizimu Africa kulenyanga yabesimame uMnyango wezokuThutha KwaZulu-Natali ubambisene nalabaculi wethula leCD kulo lonke izwe.

Ngiyabonga.

 

back